SARANGANI- Personal nga mibisita si Pangulong Ferdinand Marcos Jr. sa Sarangani ning adlawa, Hunyo 15 aron susihon ang kadaot nga nahatag sa magnitude 7.8 nga linog sa Mindanao.
Naghimo siya og aerial inspection sa Glan ug nakigkita sa mga pamilyang nagpabilin sa evacuation sites aron mahibal-an ang ilang kahimtang.
Mitunol usab ang Pangulo og ₱20 milyon nga ayuda ngadto sa lokal nga kagamhanan sa Glan alang sa rehabilitasyon ug pagtukod pag-usab sa mga nagubang panimalay.
Samtang, nagpadayon ang DSWD sa paghatag og pinansyal nga tabang ug relief assistance sa mga apektadong pamilya.
Gisusi usab ni Marcos ang kahimtang sa Sarangani Provincial Hospital ug uban pang pasilidad nga nadaot sa linog, samtang nagpadala ang DPWH og dugang nga mga tent alang sa mga pasyente.
Sa pagtapos sa iyang pagbisita, gisiguro sa Pangulo nga magpadayon ang suporta sa nasudnong gobyerno aron mapaspasan ang pagbangon sa Sarangani ug uban pang naapektuhang komunidad.
