Gipakusgan sa Department of Education o DepEd General Santos City ang koordinasyon uban sa City Health Office human sa pagreport sa kumpirmadong HIV cases taliwala sa mga estudyante.
Matud ni Schools Division Superintendent Isagani Dela Cruz, usa kini ka kritikal nga concern tungod kay direktang nalambigit ang panglawas ug kaayohan sa mga batan-on.
Sumala sa surveillance data sa City Health Office, pinakadaghan sa mga na-report nga kaso ang anaa sa edad 15 hangtod 24 anyos.
Gipasiugda sa mga health authority ang kamahinungdanon sa health education, hustong pagdesisyon ug sayong pagpapa-test aron mapugngan ang pagkaylap sa HIV ug masayong matino ang mga adunay infection.
Matud sa City Health Office, padayon nilang gipadaghan ang HIV testing services aron mas sayong mahibal-an ang mga kaso ug mahatagan dayon og hustong medical care ang mga apektado.
Samtang, gidasig sa DepEd ang mga eskwelahan nga palig-onon ang guidance services ug age-appropriate reproductive health education, samtang gisiguro sa mga otoridad ang confidentiality ug pagpanalipod sa identidad sa mga estudyanteng nakumpirmang positibo sa HIV.
