Pahugtan pa sa Department of Education o DepEd General Santos City ang security measures sa mga eskwelahan sa dakbayan human sa nahitabong pagpamusil sulod sa Banga National High School sa South Cotabato nga nalambigit ang usa ka estudyante.
Sumala ni Kenneth Carisma, Education Program Supervisor ug tigpamaba sa DepEd-Gensan Division, pakusgan ang pagbantay sa mga eskwelahan pinaagi sa koordinasyon sa kapulisan ug mga barangay tanod.
Lakip sa ilang hatagan og pagtagad ang kahimtang sa mga perimeter wall sa pipila ka eskwelahan sa siyudad, ilabina ang mga wala pa makompleto ang pader ug ang mga nadaot tungod sa kusog nga pagtay-og niadtong milabayng Hunyo.
Matod sa DepEd-Gensan, nagpaabot pa sila sa budget gikan sa national government alang sa pag-ayo ug pagpauswag sa mga perimeter wall sa mga eskwelahan.
