Posibleng ipadayon hangtod usa ka bulan ang modular classes sa mga pampubliko ug pribadong tulunghaan sa Banga, South Cotabato, aron mahatagan og igong panahon ang mga estudyante ug ilang mga ginikanan nga makaagi sa trauma intervention program.
Matod ni Banga Mayor Albert Palencia, gikinahanglan ang dugang nga panahon alang sa Department of Social Welfare and Development o DSWD aron mapadayon ang psychosocial ug trauma intervention alang sa mga naapektuhan, ilabina sa Banga National High School.
Human sa usa ka bulan, susihon sa mga hingtungdan nga ahensya kung andam na ba ang mga estudyante ug magtutudlo sa pagbalik sa face-to-face classes.
Gipatuman ang modular classes human sa pagpamusil sa Banga National High School niadtong Septiyembre 18.
Padayon usab ang paghatag og tabang sa lokal nga panggamhanan ngadto sa mga biktima ug ilang mga pamilya, samtang gipalig-on ang mga lakang alang sa seguridad sa mga tulunghaan.
