Malampusong nakab-ot ang unang “breakthrough” sa pag-drill sa tunel diha sa Quezon Avenue station nga kabahin sa nagpadayon nga proyekto sa Metro Manila Subway.
Atol sa pagbisita ni Presidente Ferdinand Marcos Jr. sa lugar sa Quezon Avenue station kagahapon, Septiyembre 23, nahuman ang pagkubkob gikan sa southbound nga bahin sa North Avenue station, kini nga bahin naglangkob sa gilay-on nga mokabat sa 1.1 kilometro ug anaa sa giladmon nga 34 metros ubos sa yuta.
Ang “breakthrough” nagpasabot sa malampusong pagbuslot sa kataposang bungbong human mahuman ang proseso sa pagkubkob sa tunel—ang pamaagi sa pagkalot ilawom sa yuta.
Ang mga operasyon sa pag-drill sa tunel nagpadayon na karon gikan sa Quezon Avenue station paingon sa East Avenue station, nga adunay gilay-on nga 1.5 kilometro.
Matod ni Department of Transportation Acting Secretary Giovanni Lopez, mamenosan pag-ayo ang oras sa biyahe gikan sa Valenzuela City paingon sa NAIA kung hingpit na nga mag-operate ang underground railway.
Gibanabana nga mokabat sa 500,000 ka mga pasahero ang makapahimulos sa Metro Manila Subway kung ablihan na kini alang sa publiko.
