GENSAN – Mipadayag si Mayor Jayson John Joyce sa Jose Abad Santos(JAS), Davao Occidental og mga konstityuwente niini sa ilang kalipay tungod sa kataposan nakita ang tinuod nga sitwasyon sa pipila sa ilang lugar nga dugay nang biktima sa substandard ug ghost projects.
Kini human nadiskubre kagahapon sa Independent Commission for Infrastructure (ICI) ug Department of Public Works and Highways (DPWH) sa ilang inspeksyon nga ang flood control project sa Brgy Kulaman bag-o pa lang nagsugod sa konstruksyon duha ngadto sa tulo ka semana ang nakalaba, bisan pa sa taho nga fully paid na kini ug angayang mahuman sa 2022.
Sa daghang katuigan, daghan sa mga proyekto ang gipundohan sa nasudnong kagamhanan sa JAS apan walay ma-coordinate sa LGU, wala mahibal-i ang lokasyon, ug walay nasugdan bisan klaro ang pundo.
Gibutyag ni Mayor Joyce nga pinaagi sa Sumbong sa Pangulo, ang nasangpit nga proyekto nga nagkantidad ug Php96.5 million nadiskubre ubos sa St. Timothy Construction Corporation sa mag-asawang Curlee ug Sara Discaya.
Para sa mga lumulupyo, timailhan kini nga kaylap ug lawom ang sistema sa korapsyon, tungod kay bisan ang labing hilit nga komunidad biktima sa substandard nga mga proyekto.
Sa pagkatinuod, ang LGU mismo ang nagbutang ug river protection system sa miaging mga buwan tungod sa padayong pagbaha ug hulga sa substandard nga tulay nga maanod.
Gibutyag nga 2022 ang target completion sa proyekto, pero pagkahuman lang nga mibuto sa mga balita ang mga isyu sa mga ghost projects, maoy pa ang pagsugod sa pagtrabaho sa nasampit nga proyekto.
Kadaghanan sa mga proyekto sa JAS nga gipundohan sa nasudnong kagamhanan walay tarpaulin, notice, o pahibalo nga naglatid sa status sa pagpatuman.
