GENERAL SANTOS CITY – Nagkapahigayon na og sunod-sunod nga coordination meeting ang General Santos City Police Office kung asa gihisgotan ang pagpangandam alang sa hugtanon nga seguridad nga ipatuman dungan sa nagkaduol nga Semana Santa ug Summer Vacation.
Matud ni PCol. Nicomedes Olaivar Jr, City Director sa GSCPO, andam sila sa ipatuman nga seguridad sa siyudad kalabot sa nasampit nga hisgutanan.
Adunay na-reserve nga 400 ka pulis nga madeploy sa mga simbahan, airport, pantalan, malls , beach resorts apil tourist destinations.
Mamahimong katambayayong sa kapulisan, ang Task Force-GenSan, Philippine Coast Guard lakip na ang lokal nga panggamhanan sa syudad alang sa hapsay ug malinawon nga pagsaulog sa Semana Santa sa syudad.
Aduna usab imontar ang kapulisan nga police assistance desks sa simbahan ug ubang areas of convergence.
Dungan niini ang pagpatuman og hugot nga checkpoints sa entry ug exit points sa dakbayan.
