GENERAL SANTOS CITY – Hisgutanan ang gipahigayong Via Crusis kon Stations of the Cross nga gipahigayon sa mga sakop sa Police Regional Office 12 karong Biyernes Santo.
Kini sa pagpanguna sa ilang labaw nga si Police Brigadier General Eliseo Tam Rasco, regional director sa PRO-12.
Kahibaluan nga sa gipahigayong Via Crusis naghakwat ug krus ang gatusan ka mga sakop apil mga opisyal sa PRO-12 gikan sa GenSan Airport padulong sa chapel sa PNP 12 Headquarters, samtang gihakwat ni Gen. Rasco ang labing dakong krus.
Miapil usab sa prusisyon ang pamilya sa mga pulis.
Luyo nga matag tuig na kining ginapahigayon, daw sa mahinungdanon ning tuiga gumikan ang gihimong paghakwat sa labing dakong krus daw sa nagpasabot sa dakong krus nga gipas-an ni Gen. Rasco gumikan sa pagkalambigit sa kontrobersyal nga P2 billion Police Paluwagan Movement (PPM) scam sa dakong ihap sa mga pulis sa Region 12, apil na ang pipila ka mga opisyal.
Ug gani, kasamtangang atua sa Police Holding and Accounting Unit (PHAU) sa Camp Crame ang pipila ka mga gipalagpot nga opisyal, usa niini ang kanhing city PNP director sa GenSan nga si Police Col. Raul Supiter human malambigit sa PPM.
Hinungdan nga desidido ang liderato sa PRO-12 nga mabalik ang high morale sa mga pulis aron mahimo ug insakto ang ilang trabaho.
