Gipahibalo sa Philippine Institute of Volcanology and Seismology (PHIVOLCS) nga posible pa nga makasinati og laing pagbuto o explosive eruption ang Bulkang Mayon sa Albay.
Sumala kang PHIVOLCS Mayon Observatory Resident Volcanologist Doreen Abelinde, padayon nga naghubag ang pipila ka bahin sa bulkan base sa ilang pinakabag-ong pagsusi.
Nakaparehistro usab ang ahensya og taas nga lebel sa sulfur dioxide emission, nga nagpakita nga adunay magma sa mabaw nga bahin sa bulkan.
Gipasabot sa opisyal nga bag-o pa ug talagsaon ang kasamtangang lihok sa bulkan, busa lisod pa kini hingpit nga matagna pinaagi sa mga instrumento.
Kulang usab ang mga timailhan o precursor nga kasagarang makita sa dili pa mahitabo ang pagbuto.
Gidugang ni Abelinde nga ang bag-ohay lang nga effusive eruption mas huyang kumpara sa explosive eruption, diin mas kusog ug mas peligroso ang pagbuto sa bulkan.
Tungod sa bag-ong kalihokan niini, gipataas na sa Alert Level 3 ang status sa Bulkang Mayon.
Gimando usab ang paghikling sa mga residente nga nagpuyo sulod sa unom ka kilometros nga Permanent Danger Zone (PDZ).
Nagpasidaan usab ang mga otoridad sa mga kasikbit nga komunidad batok sa grabeng peligro nga mahimong resulta sa ashfall o pag-ulan sa abo, rockfall o pagkahulog sa mga bato, ug pyroclastic density currents o kusog kaayong pag-agas sa init nga abo, bato ug gas gikan sa bulkan.
Giawhag ang tanang residente nga mosunod sa mga pahimangno sa lokal nga otoridad, ilabina ang mga nagpuyo sulod sa danger zone, ug dili mosulod sa gidili nga mga lugar aron malikayan ang peligro sa ilang kinabuhi.
