Nagpadala na og rescue ug assistance team ang Philippine Red Cross (PRC) aron motabang sa pagbakwit sa mga residente ug pag-apod-apod og face masks sa mga komunidad nga posibleng maapektuhan sa pag-alburuto sa Bulkang Mayon human ipataas sa Alert Level 3 ang kahimtang niini.
Nagsugod ang pagbakwit sa mga residente sa Barangays Anoling ug Quirangay sa lungsod sa Camalig alas-1:00 sa hapon ning Oktubre 30, 2026, samtang nangandam usab ang lokal nga kagamhanan sa Tabaco alang sa posibleng pagbakwit sa ilang mga residente.
Giklaro sa PRC nga wala nay dugang pamilya nga kinahanglan ibakwit sa Malilipot tungod kay daan nang gibalhin sa relocation site ang mga residente didto.
Gipahinumdoman ni PRC Chairman ug CEO Richard J. Gordon ang mga residente sulod sa unom ka kilometrong danger zone nga seryosohon ang mga pahimangno sa pagbakwit ug sundon ang mga mando sa lokal nga mga otoridad.
Giawhag usab ang publiko nga magpabiling alerto, andamon ang mga importanteng gamit, magsul-ob og face mask aron mapanalipdan batok sa ashfall ug likayan ang pagsulod sa mga lugar nga gidili sa mga otoridad.
Padayon nga nagbantay ang PRC sa kahimtang sa Albay aron makahatag dayon og tabang sa mga komunidad nga posibleng maapektuhan sa kalihokan sa bulkan.
