Giaprobahan sa Estados Unidos ang pagbaligya og 500 ka ‘Patriot missiles’ ngadto sa Ukraine aron magamit sa pagpanalipod batok sa nagkagrabeng pag-atake sa Russia gamit ang mga ‘missile’ ug eroplano.
Apan, gibutyag ni Ukrainian President Volodymyr Zelensky nga posibleng molungtad pa og pipila ka tuig una mahatod ang maong mga armas bisan pa sa dinaliang panginahanglan sa iyang nasud.
Matud sa US State Department, mokabat sa $2.1 billion ang kantidad sa mga ‘PAC-3 interceptor missiles’ nga pondohan pinaagi sa tabang pinansyal gikan sa mga kaalyado sa Ukraine sa Europe ug Canada, lakip ang Germany ug Norway.
Gipadayag ni Zelensky nga gikinahanglan na nila karon ang ‘Patriot missiles’ tungod sa padayon nga pag-atake sa Russia sa mga importanteng pasilidad sa enerhiya sa Ukraine samtang nagkaduol ang panahon sa tingtugnaw.
Samtang, nagpabiling dili klaro ang iskedyul sa paghimo ug paghatod sa mga ‘missile’ tungod kay bag-o pa kining tukoron ug limitado usab ang produksyon niini nga mokabat lamang sa 600 ka missile matag tuig, sumala sa US Department of Defense.
