GENSAN- Gikumpirma ni Gerry Gonzales, officer in charge sa Antonio C. Acharon Memorial Park kon ACAMP nga anaa na sa 99% ang ilang pagpangandam alang sa umaabot nga Kalag-Kalag, diin gi-‘coordinate’ na nila ang mga lakang sa seguridad ug kaluwasan kauban ang Philippine National Police (PNP), Philippine Coast Guard, mga force multiplier ug mga medical personnel.
Matod ni Gonzales, sugod ugma sa buntag, Nobyembre 1, ipatuman na ang mga gipangandaman nga lakang aron masiguro ang hapsay ug kontroladong pagsulod ug paggawas sa mga tawo ug sakyanan sa sementeryo.
Kabahin niini ang pagbutang og mga ‘blockade’ sa gagmayng mga dalan sa palibot sa Fernandez Street sa Barangay Calumpang, nga gilaumang sugdan karong adlawa sa dili pa moabot ang alas-singko sa hapon.
Gipasabot ni Gonzales nga ang entrance sa sementeryo magpabilin sa Fernandez Street, samtang ang exit anaa sa Phil-Am Road aron mas ma-regulate ang dagan sa mga tawo ug sakyanan ug malikayan ang paghuot sa maong lugar.
Gidugang niya nga dili tuyo sa mga ‘blockade’ nga makababag sa trapiko, hinuon gibutang kini aron mas makontrol ang lihok sa mga pedestrian ug mga motorista sulod ug palibot sa sementeryo.
