GENSAN– Gilaumang molungtad hangtod alas-12:00 sa tungang gabii ang biyahe sa mga bus sama sa Yellow Bus Lines panahon sa pagsaulog sa Kalag-Kalag, aron maserbisyohan ang mga pasahero nga mobiyahe paingon sa ilang tagsa-tagsa ka destinasyon.
Sumala ni Renato Gonzales, City Administration Personnel Team Leader, base sa feedback nga ilang nadawat, hangtod alas-12:00 sa tungang gabii ang posibleng operasyon sa mga bus, diin magsugod usab ang unang biyahe sa alas-8:00 sa buntag.
Gipasabot ni Gonzales nga kasagaran, hangtod lamang alas-10:00 sa gabii ang regular nga biyahe sa mga bus, apan alang sa pagsaulog sa Kalag-Kalag, andam ang mga kompanya sa pagpalugway sa ilang oras sa operasyon depende sa gidaghanon sa mga pasahero.
Dugang pa niya, padayon nilang ginamonitor ang gidaghanon sa mga pasahero ug maghulat sa aktuwal nga sitwasyon aron mahibal-an kon gikinahanglan ba nga dugangan pa ang oras sa biyahe.
Gilaumang mas modagsa pa ang mga pasahero ning adlawa, ilabina ang mga mouli sa ilang mga probinsya ug lungsod aron muduaw sa ilang mga minahal sa kinabuhi nga namatay.
