Gimando sa Office of the Ombudsman ang unom ka bulan nga preventive suspension nga walay sweldo batok sa lima ka project engineers sa DPWH Bulacan First District Engineering Office.
Lakip sa mga gisuspenso mao sila Irene D. Ontingco, Kevin A. Geronimo, John Michael E. Ramos, Bernardo P. Villafuerte, ug Michelle C. Cruz tungod sa giingong kalambigitan sa P188.8 million nga ghost flood control projects sa Baliuag, Bulacan.
Nag-atubang ang lima og mga administratibong kaso nga may kalabotan sa grave misconduct, serious dishonesty, ug gross neglect of duty, kalabot sa tulo ka proyekto sa reinforced concrete slope revetments niadtong 2024.
Base sa imbestigasyon, giingong nagpalsipikar ug gi-peke sa mga engineer ang mga dokumento kalabot sa inspeksyon, pagdawat, ug pagbayad aron magmugna og impresyon nga tinuod ug nahuman ang maong mga proyekto.
Gipaklaro sa Ombudsman nga gikinahanglan ang suspensyon tungod sa kalig-on sa mga ebidensya batok kanila ug aron malikayan ang posibleng pagsulay sa pag-impluwensya sa mga saksi samtang nagpadayon ang imbestigasyon.
Samtang, wala maapil sa maong suspension order si kanhi Officer-in-Charge District Engineer Brice Ericson D. Hernandez ug kanhi Assistant District Engineer Jaypee D. Mendoza tungod kay dili na sila aktibong nagserbisyo sa gobyerno.
