Nagsugod ang moderately explosive eruption sa Bulkang Mayon sa Albay pasado alas-11:53 ning udto, Oktubre 30, hinungdan nga gipataas sa Philippine Institute of Volcanology and Seismology (PHIVOLCS) sa Alert Level 3 ang kahimtang sa bulkan.
Base sa monitoring sa PHIVOLCS, mibuga ang bulkan og aso o ash plume nga mikabat sa 3,000 metros ang gihabogon gikan sa crater niini, timailhan nga adunay magma nga duol na sa ibabaw.
Samtang nagpadayon ang pagbuto, gidala sa hangin paingon sa west-southwest ang abo nga posibleng makaapekto sa mga komunidad sa Guinobatan, Camalig ug Daraga.
Gipasidan-an sa PHIVOLCS ang mga residente sa posibleng ashfall ug delikadong volcanic gases nga mahimong makaapekto sa panglawas, ilabina sa pagginhawa, ingon man sa mga tanom ug panginabuhian sa mga mag-uuma.
Tungod niini, giawhag ang publiko nga magbantay sa mga opisyal nga pahimangno ug hugot nga gidili ang pagsulod sa unom ka kilometrong Permanent Danger Zone o PDZ tungod sa hulga sa kalit nga pagbuto ug pyroclastic density currents o init ug paspas nga pag-haguros sa abo, bato ug gas.
Samtang, pipila ka opisina sa mga apektadong lugar ang mihunong sa ilang operasyon tungod sa kalihokan sa bulkan, samtang nagpatuman na usab og mga “contingency measure” ang lokal nga panggamhanan aron masiguro ang kaluwasan sa mga residente.
