Photo by Bombo Jojo Bacalanmo
GENERAL SANTOS CITY – Buot karon sa pipila ka mga ginikanan sa mga senior high graduate sa General Santos City High School nga wala nakasul-ob ug toga ang ilang anak atul sa graduation exercises kagahapong adlawa nga mauli ang ilang gibayad nga salapi.
Kini human nga daghan sa mga estudyante ang wala nakasuot sa ilang pink nga toga, human nga wala nahuman ug tahi.
Kahibaluan nga may mga ginikanan nga nag-walkout human makita nga wala nakasul-ob ug toga ang ilang anak dihang nagmartsa.
Matud sa usa sa mga ginikanan nga nakahinabi sa Bombo Radyo GenSan, Enero pa lang nakabayad na sila ug tig-P300 alang sa pink nga toga alang sa graduation sa senior high school.
Apan wala naapas sa paghuman sa mga mananahi ug kapin 70 ka mga estudyante ang wala nakasul-ob sa naasoy’ng toga.
Hinungdan nga inay nga malipay sa pag-graduate sa ilang mga anak, nagkaguliyang na hinuon atol mismo sa graduation rites human nga daghang mga estudyante ug ginikanan ang mialma sa wala gilauman nga panghitabo.
Ug gani, samtang nagpadayon ang graduation rites kagahapong adlawa, may mga ginikanan nga nang-gihilak atubang sa assistant principal tungod wala nakasul-ob ug toga ang ilang anak, nga mao unta ang ilang gikahinaman nga makita.
Hinuon, aduna usay uban nga gipugngan na lang ang gibati nga kasuko ug kahiubos, ug gipili na lamang nga sabton ang sitwasyon ug maglipay gihapon tungod sa pag-gradwar sa ilang mga anak.
May uban pang mga graduates nga napugos na lamang musul-ob ug puti nga toga, samtang ang uban ang nag-sibilyan na lamang dihang nagmartsa.
Samtang ang uban ang nagpulihanay na lang ug toga atul sa pagsaka sa entablado sa pagdawat sa ilang diploma.
Hinungdan nga buot karon sa mga ginikanan nga mapanubag usab apil ang tailoring shop nga maoy midawat sa pagtahi sa mga toga para sa mi-graduate nga mga senior high graduate.
