Nagtuo si Sen. JV Ejercito nga dili pag-atake sa kagawasan sa Senado ang pagkadakop sa iyang igsoon nga si Sen. Jinggoy Estrada.
Mahinumduman nga miaging adlaw gisilbihan og warrant si Estrada sulod sa Senado, apan gipangatarungan sa kampo sa senador nga misurender siya human personal nga miadto sa Kampo Crame dungan sa paggawas sa warrant of arrest may kalabotan sa iyang kasong plunder.
Sa usa ka interbyu, giingon ni Ejercito nga dili angay tan-awon sa publiko nga pag-atake sa Senado ang pagkadakop sa iyang igsoon kundili kabahin lamang sa legal nga proseso.
Dugang pa niya nga dili usab kini angay makaapekto sa trabaho sa Senado isip usa ka legislative body ug impeachment court.
Bisan giangkon sa senador nga lisod alang kaniya ang sitwasyon tungod kay si Estrada dili lamang niya kauban sa trabaho kundili iyang igsoon usab, nagtuo gihapon siya nga ang korte maoy pinakamaayong mohukom sa kaso niini.
Gipasiugda ni Ejercito nga kinahanglan mulabaw ang hustisya tungod kay kuwarta ug pagsalig sa katawhan ang nalambigit niini.
