Makig-uban ang Filipino tennis star nga si Alex Eala sa tennis legend nga si Venus Williams sa doubles draw sa Bad Homburg Open, sumala kana sa report sa Tennis Channel.
Moapil usab kang Eala ug Williams ang German player nga si Eva Lys, kinsa gihatagan og main draw wildcard sa singles competition sa WTA 500 tournament nga ipahigayon sa Bad Homburg, Germany.
Para kang Eala, kinsa 20 anyos, usa ka talagsaon nga oportunidad nga makauban sa team si Williams, usa ka pito ka beses nga Grand Slam singles champion ug giisip nga usa sa labing dominanteng magdudula sa kasaysayan sa tennis.
Dili kini ang unang higayon nga atubangon ni Eala ang pamilyang Williams sa court. Niadtong Enero, gipildi nila ni Eala ug Iva Jovic ang kombinasyon nila ni Venus Williams ug Elina Svitolina sa Round of 16 sa ASB Classic.
Samtang, magsugod si Eala sa iyang grass-court season sa WTA 125 Birmingham Open sa Lunes. Gikatakda usab siyang moapil sa doubles event uban sa Czech player nga si Nikola Bartunkova.
