Hugot nga gipatuman sa Department of Education-General Santos City Division ang “No Collection Policy” isip kabahin sa pagpangandam alang sa umaabot nga pagsugod sa klase.
Sumala ni DepEd GenSan Division Information Officer, Kenneth Carisma, gidili ang pagpangayo og bisan unsang kontribusyon o bayranan gikan sa mga ginikanan ug estudyante atol sa enrollment ug pagsugod sa klase gawas lamang sa boluntaryong donasyon nga gitugotan ubos sa kasamtangang polisiya sa departamento.
Samtang, sugod usab kagahapong adlawa ang clean-up drive sa nagkadaiyang pampublikong eskwelahan sa dakbayan aron masiguro nga limpyo, hapsay ug andam ang mga classroom ug school facilities alang sa mga estudyante.
Nag-apil sa maong kalihokan ang mga magtutudlo, volunteers, ginikanan ug uban pang stakeholders isip kabahin sa Brigada Eskwela.
Gidasig usab sa DepEd GenSan ang publiko nga magtinabangay aron masiguro ang luwas ug maayong palibot sa pagkat-on alang sa tanang kabataan sa pagsugod sa bag-ong school year.
