GENERAL SANTOS CITY – Anti-poor ang tax reform law nga gipasa sa kasamtangang administrasyon.
Kini ang panglantaw ni Kag. Edgar Yumang kalabot sa dili pa lamang dugay gipirmahan ni Pangulong Rodrigo Duterte nga Tax Reform for Acceleration and Inclusion (TRAIN).
Sumala pa nga dili siya uyon sa maong balaod, gumikan maayo lamang kini sa mga empleyado nga gadawat ug suweldo matag kinsenas, apan dili alang sa mga ultimong tawo nga nangempleyo ug walay sweldo sama sa mga tricycle driver, kargador ug uban pa.
Kini gumikan sa hilabihang pagtaas sa presyo sa mga nag-unang palaliton, kung asa ang mga kabus ang maoy nag-unang maapektuhan ug mag-abaga.
Hinungdan nga musamot matud pa ug ka-kabus ang mga kabus.
Una nang gipasigarbo sa gobyerno nga kapin pito ka milyon ka mga empleyado nga may sweldo nga P20,000 paubos matag bulan ang dili na kaltasan ug buhis, hinungdan nga mas dako ang ilang take home pay kon mauli sa pamilya.
Gipasigarbo sa gobyerno ang naasoy’ng balaod gumikan ang 70 percent sa kitaon naasoy tax reform law ang gamiton sa proyekto nga “Build, build, Build”, samtang ang 30% ang alang sa edukasyon, kahimsog, ug uban pa.
