SARANGANI-Patay ang usa ka lalaki human ang natigayon nga aksidente sa dalan, sa Purok 5, Barangay Poblacion, Maasim, Sarangani Province, kaganinang kaadlawon.
Kini nagresulta sa hinanaling kamatayon sa nagpangalan og Jasper Ivan Cabaraban nga taga Glan Sarangani Province.
Sa nakuhang impormasyon sa Bombo Radyo, nasayran nga nabangga ang Hyundai Reina nga gimaneho sa biktima sa likod nga bahin sa usa ka Fuso Truck Van nga gimanehuan ni Jesus Sabando Jr., residente sa Barangay Mabuhay, General Santos City.
Ang truck van gikan sa Kiamba paingon sa Gensan apan pag-abot sa Purok 5, Barangay Poblacion, kalit kini giigo sa likod sa Hyundai Reina. Tungod sa kusog sa impact, naipit ang biktima sulod sa iyang sakyanan og diha-diha namatay.
Nasayran usab nga sa wala pa ang aksidente, nalambigit ang maong sakyanan sa hit-and-run sa Barangay Kabatiol, diin duha ka menor de edad ang nasamdan ug gidala sa ospital sa Gensan alang sa medikasyon.
Ang duha ka sakyanan karon anaa na sa kustodiya sa Maasim Municipal Police Station samtang padayon ang imbestigasyon sa aksidente.
