Gipasalig ni Senate President Vicente Tito Sotto III nga andam na ang Senado sa posibleng paglingkod isip impeachment court kon mapasa na sa Kamara ang mga reklamo nga nagtinguha sa pagtangtang kang Vice President Sara Duterte.
Matod niya, nag-imbitar siya og pipila ka mambabalaod gikan sa majority bloc sa Senado alang sa usa ka panihapon aron hisgutan ang posibleng pagdawat sa Articles of Impeachment, apan gipatin-aw nga dili kini opisyal nga “caucus”.
Gipasiugda usab ni Sotto nga magpabilin nga patas ug walay pabor ang Senado sa panahon sa pagdunggog ug maghulat sila sa mga ebidensiya nga ipresentar.
Para sa ilang preparasyon, nagtuon siya sa Rules of Court pinaagi sa crash program ug nakadawat na usab og briefing gikan sa mga abogado sa Court of Appeals ug Court of Tax Appeals.
Giingon niya nga moaksyon ang Senado dayon o “forthwith” sa oras nga madawat ang pormal nga reklamo gikan sa Kamara. Samtang, padayon nga giingon ni VP Duterte nga dapat ibasura ang mga kaso batok kaniya tungod sa kakulang sa ebidensiya.
