Aron malikayan ang posibleng pagkalangan o pagka-delay sa pagdawat sa binulan nga pensyon, kusgan nga gipasidan-an sa Social Security System (SSS) ang pipila ka pensyonado nga tapuson ang ilang Annual Confirmation of Pensioners o ACOP compliance sa dili pa matapos ang bulan sa Abril.
Gi-ila sa ahensya nga ang mga kinahanglan mosunod mao ang retirement pensioner nga 80 anyos pataas nga nagpuyo sa Pilipinas, mga total disability pensioner, ug mga pensyonado nga naa sa gawas sa nasod.
Apil usab sa obligadong mag-comply ang survivor pensioner ug mga dependent children nga naa ilawom sa guardianship, ilabi na kung Abril ang bulan sa ilang birthday o sa namatay nga miyembro.
Aron mas paspas ang proseso, gidasig sa SSS ang paggamit sa online compliance pinaagi sa National ID eVerify System sa Philippine Statistics Authority (PSA).
Gipasabot usab nga ang ordinaryong retirement pensioner nga nagpuyo sa Pilipinas dili apil sa maong requirement.
Apan kon ang usa ka pensyonado dungan nga nakadawat usab og survivor pension, kinahanglan siya mosumite og duha ka ACOP forms aron masiguro ang padayon nga pagdawat sa benepisyo.
