GENSAN- Gipadayag ni Atty. Rogelio Garcia nga daghang katawhan ang nalipay sa pagkadakop ni kanhi Ako Bicol Partylist Rep. Zaldy Co didto sa Czech Republic, kay matod pa niya, kini usa ka hinungdan aron mas masayran na ang kamatuoran sa mga reklamo ug alegasyon nga naglibot kaniya.
Sumala pa sa abogado nga ang maong pagkadakop usa ka dakong kalamboan sa pagpangita og hustisya ilabi na sa mga isyu nga nalambigit sa mga proyekto sa gobyerno ug posible nga anomaliya sa flood control.
Matod pa sa abogado, importante nga mapatuman ang hustisya ug masuta pag-ayo ang tinuod nga nahitabo, ug kon kinahanglan, ipahamtang ang mga angay nga kaso batok sa mga nalambigit.
Nagpaabot usab siya nga kung mabalik si Zaldy Co sa Pilipinas pinaagi sa deportation o extradition, kinahanglan nga mohatag kini og tinuod nga pahayag pinaagi sa affidavit aron mas klaro ang mga detalye sa kontrobersiya.
Sa katapusan, iyang giingon nga ang katawhan naglaum nga ang kamatuoran mogawas ug ang mga responsable sa maong isyu mapanubag sa balaod.
