Gipahibalo sa Japan Meteorological Agency (JMA) ang bag-ong kategorya alang sa grabeng kainit sa panahon, diin ang temperatura nga moabot og 40°C pataas tawgon na og “cruelly hot” o “kokusho-bi.”
Tumong niini nga mas epektibo nga mapahimangnoan ang publiko sa peligro nga dala sa grabeng init samtang padayon ang pagtaas sa heatwave days sa nasod.
Base sa survey sa ahensya nga nakakuha og 478,000 ka tubag, ang “cruelly hot” mao ang pinakapopular nga ngalan nga gisugyot sa katawhan.
Ang bag-ong termino idugang sa kasamtangang sistema sa JMA nga nagklasipikar sa 25°C pataas isip summer day, 30°C pataas isip midsummer day, ug 35°C pataas isip extremely hot day.
Giila sa ahensya nga ang bag-ong label makatabang sa pagpadako sa kahibalo sa publiko bahin sa posibleng heat-related illnesses.
Matud pa sa JMA, kini usa ka tubag sa padayon nga pag-init sa klima sa Japan, nga nakarekord sa pinakainit nga ting-init sukad 1989.
