Gipatuman sa gobyerno ang bag-ong polisiya nga nagtakda og limitasyon sa paglihok sa presyo sa mga produktong petrolyo human ideklara ang national energy emergency.
Matod sa Department of Energy (DOE), dili nila direktang kontrolon ang presyo sa lana, apan ilang gi-regulate ang gidak-on sa taas o ubos nga mahimong ipatuman sa mga oil company.
Sa ilawom sa balaod, obligadong mosunod ang mga kumpanya sa minimum rollback ug maximum price increase nga itakda sa gobyerno.
Sumala pa ni Energy Secretary Sharon Garin nga ang mga oil company kinahanglan mosunod sa gimando nga adjustments, apil na ang rollback nga mahimong moabot og P24.94 sa diesel, P3.41 sa gasolina, ug P2.00 sa kerosene.
Giila usab nga dili pwede molapas ang presyo sa gitakdang limitasyon bisan pa og adunay pagtaas o pagkunhod sa merkado.
Una nang nanawagan si President Ferdinand Marcos Jr. sa hingpit ug dayon nga pagpatuman sa rollback aron mahatagan og kahupayan ang mga konsumidor.
