GENSAN- Gikuwestiyon ni Atty. Rogelio Garcia ang kredibilidad ni Ramil Madriaga human kini nialegar nga nahimo siyang bagman sa pamilyang Duterte didto sa House Committee on Justice.
Matod ni Garcia, sayon ra kaayong pabulaanan ang testimoniya ni Madriaga tungod kay wala gani kini mailhi sa hepe sa seguridad ni Bise Presidente Sara Duterte nga si Col. Lacheca.
Gidudahang dunay “direktor” o nagpaluyo niining maong pasangil human mibuto ang balita nga gibisita si Madriaga nina kanhi Senador Leila de Lima ug Antonio Trillanes IV sa prisuhan.
Alang sa maong abogado, kadudahan ang maong mga pagbisita gikan sa mga iladong kritiko sa mga Duterte ug posibleng imbento lamang ang tibuok istorya.
Gihulagway ni Garcia ang mga alegasyon ni Madriaga isip usa ka dako nga pagpamakak ug walay basehan nga kamatuoran.
Tungod niini, nagtuo siya nga dili angay tuohan sa katawhan ang maong mga pamahayag nga giisip niya nga usa lamang ka “sham.”
