GENSAN- Naghatag dayon og ayuda si Mayor Lorelie Pacquiao sa mga pamilya nga naapektuhan sa sunog nga nahitabo kagahapon, pasado alas 7 sa gabii sa Prk. Soling, Olarte, Barangay Labangal, kon asa tulo ka pamilya ang naapektuhan.
Gisiguro ni Mayor Pacquiao sa mga biktima nga dili sila pasagdan sa lokal nga panggamhanan. Iyang gipahibalo nga ang matag pamilya nga adunay totally damaged makadawat og P15,000 nga ayuda gikan sa city government.
Gihatagan usab sila og mga grocery items gikan sa LGU samtang nagpadala usab og dugang tabang ang foundation sa mayor.
Dugang pa niini, personal nga naghatag si Pacquiao og P5,000 sa matag pamilya aron makatabang sa ilang mga dayon nga panginahanglan.
Gipasabot usab sa mayor nga abri ang Barangay Hall alang sa temporaryong matulugan sa mga naapektuhan, apan pipila sa mga pamilya mipili nga mopuyo una sa ilang mga kabanay nga duol sa lugar sa sunog.
Samtang, padayon pa ang ginabuhat nga imbestigasyon sa BFP-Gensan sa hinungdan sa maong sunog.
