MANILA PHILIPPINES- Gikompirma sa Philippine National Police (PNP) ang pagsurender sa heneral sa kapulisan nga nalambigit sa drug operation sa dakbayan sa Manila niadtong 2022.
Si Police Lieutenant General Benjamin Santos Jr. boluntaryong nitahan sa Regional Trial Court Manila Branch 44 ug nipasaka kini og P200,000 nga piyansa.
Matud ni PNP spokesperson Police Brigadier General Jean Fajardo nga alas 4:48 sa kaadlawon kagahapon ni-surrender siya sa Criminal Investigation and Detection Group (CIDG).
Gibasa kaniya ang iyang warrant of arrest ug miagi usab siya sa normal nga mga pamaagi.
Mga alas 9 na sa buntag dihang gibuhian siya human makabayad sa iyang piyansa.
Una niini, ang abogado nakasumite na og surrender feelers ngadto sa CIDG.
Mokabat sa 21 ka mga aktibo ug kanhi pulis ang anaa na sa kustodiya sa PNP kalabot sa kontrobersyal nga anti-drug operation niadtong 2022.
Mokabat sa 30 ka mga pulis ang gipasakaan sa panel of prosecutors tungod sa paglapas sa Comprehensive Dangerous Drugs Acts of 2002, diin 29 sa 30 ka mga gipasakaan og kaso adunay warrant of arrest.
Lakip sa mga kaso mao ang pagtanom og mga ebidensiya ug paglangay sa pagpasaka og kaso sa drugas.
