Giklaro sa Gensan Transport Cooperative nga wala silay pagdumot o pagkalain sa buot sa ayuda nga gihatag sa lokal nga panggamhanan sa General Santos City alang sa mga traysikol drivers.
Matud ni Orly Sabelita, chairman sa Gensan Transport Cooperative, dili angay nga maglalis o magdumtanay tungod kay lahi ang sakop sa ilang prankisa nga ubos sa National Government samtang ang operasyon sa mga traysikol anaa sa ilawom sa Local Government Unit o LGU.
Dugang pa niya, lumulupyo usab sa syudad sa General Santos ang mga traysikol drivers busa angay lamang nga maapil sila sa mga programa ug tabang gikan sa lokal nga gobyerno.
Giingon usab ni Sabelita nga mas maayong magtinabangay ang tanang sektor sa transportasyon aron mas epektibong maatubang ang mga kalisod nga giagian sa mga drayber ug operators ilabina sa nagpadayon nga pagsaka sa presyo sa mga palaliton ug gasto sa operasyon.
