Padayon ang pakig-alayon sa embahada sa Pilipinas sa Russia sa mga pinoy sa Ukraine gumikan sa tension tungod sa gikaingon nga plano sa Moscow nga atakehon ang Kiev.
Matud pa ni Bombo International Correspondent Cora Adajar sa Ukraine nga gipasumiti sila og pangalan sa embahada aron masayran kung pila ang gusto nga muuli sa Pilipinas aron sundon pinaagi sa chartered flight.
Gikadugang pa ni Adajar nga business as usual o normal ang sitwasyon sa Ukraine luyo sa mga migawas nga report nga gikatakda na nga atakehon sa Russia ang maong nasud.
Sila ang hugot nga gaampo nga dili mahinayon ang kagubot gumikan daghan ang maapektuhan.
Hinoon gisultian sila sa mga opisyal sa embaha nga ipreparar na ang passport og laing mga mahinungdanong dokomento og mga butang nga madala gilayon kung mahitabo ang gikabalak-an nga kagubot.
Matud pa ni Adajar nga sa sentro sa Kiev og sa palibot walay tensyon nga nahitabo apan nakadawat sila og report sa border tali sa Ukraine og Russia nga nagpanic ang mga residente.
Samtang naghatag na og dugang instruction ang embahada nga kung mugrabe ang sitwasyon og walay internet connection na adunay usa ka lugar nga adtuan ang mga pinoy aron didto magtapok.
Sa iyang pamahayag nga daghan sa mga pinoy ang nagdumili nga muuli sa Pilipinas gumikan walay trabaho oras nga makabalik sa ilang pamilya.
