Wala magdahom si Redwan Lopez, usa ka Blood Galloner, nga makadawat siya sa Sandugo Award isip pag-ila sa iyang kanunay nga pagdonar og dugo.
Matud niini nagsugod ang iyang pagdonar og dugo niadtong 2016 human nanginahanglan og dugo ang iyang amahan. Sukad niadto, nahimo na niyang batasan ang regular nga pagdonar matag higayon nga mahimo siyang donor.
Dugang pa niya, dako ang kalipay nga iyang mabati sa matag higayon nga makadonar siya og dugo tungod kay nasayod siyang adunay tawo nga matabangan ug posibleng maluwasan og kinabuhi pinaagi niini.
Matud pa ni Lopez, usa ka dakong dungog ug kalipay ang pagkahimong recipient sa Sandugo Award, ilabi na kay nahimong paagi kini aron mailhan ang iyang kontribusyon sa pagtabang sa komunidad pinaagi sa boluntaryong pagdonar og dugo.
Gilauman usab nga ang iyang kasinatian mahimong inspirasyon sa ubang tawo nga mosuporta sa blood donation activities, ilabi na sa mga higayon nga adunay mga pasyente nga nanginahanglan og dugo.
