Nagsugod na si Pope Leo XIV sa iyang 12 ka adlaw nga pagbisita sa pipila ka nasod sa South America aron hisgotan ang nagkalain-laing isyu nga giatubang sa rehiyon, lakip ang kahimtang sa politika ug panaghiusa sa mga nasod.
Ang maong pagbisita magdala kaniya sa mga lugar nga daghan og Katolikong lumulupyo apan kasamtangang nag-atubang sa kagubot sa politika.
Ang Uruguay maoy unang nasod nga iyang gibisita diin giabiabi siya sa liboan ka mga deboto. Nailhan ang nasod tungod sa lig-on nga demokratikong sistema niini. Gikan sa Uruguay, gikatakda siyang mobiyahe paingon sa Argentina ug Peru.
Giisip ang maong biyahe nga usa sa labing mahagiton nga pagbisita sa gawas sa nasud sa usa ka lider sa Simbahang Katoliko sa milabay nga mga dekada.
Samtang, nahinumdoman nga miagi sa operasyon sa baga ang 71-anyos nga Santo Papa niadtong miaging bulan.
Apan nagpabiling malaumon ang Vatican nga maayo ang iyang kahimtang ug dili na kinahanglan ang espesyal nga pag-amping sa panglawas atol sa iyang biyahe. Gikatakda nga mobisita si Pope Leo XIV sa napulo ka siyudad ug mohatag og kinatibuk-ang 36 ka pakigpulong ngadto sa mga Katolikong magtutuo.
