Magduso si Senator Panfilo “Ping” Lacson nga adunay opisyal nga transcript ug padayon nga livestreaming sa mga hearing sa bicameral conference committee o bicam aron masundan sa publiko ang mga kausaban sa proposed 2027 national budget.
Matod ni Lacson, importante nga adunay opisyal nga rekord sa mga diskusyon sa bicam aron klarong mahibal-an kon kinsa nga mga magbabalaod ang nagsugyot ug nagduso sa mga pag-usab o realignment sa mga probisyon sa badyet.
Gipunting sa senador nga dugay nang walay opisyal nga transcript ang mga hearing sa bicam.
Busa, gawas sa livestreaming, gusto usab niya nga ipatik sa website sa Senado ang mga rekord sa deliberasyon aron mailhan ang mga senador nga nagsugyot sa mga kausaban sa budget bill.
Plano usab nga imbitahon sa mga hearing ang mga civil society groups nga magsilbing mga tigbantay aron malikayan ang posibleng pag-abuso sa proseso.
Giawhag usab ni Lacson ang maong mga grupo nga dili lamang magbantay, kondili ipahibalo usab sa publiko ang bisan unsang kuwestiyonableng lihok aron mapanubag ang mga responsable niini.
