Nakaapekto sa kapin sa 14 ka bangko, mga convenience store, airport ug uban pang establisimyento sa Japan ang sunod-sunod nga cyberattacks nga miresulta sa problema sa ilang mga computer ug banking systems.
Matod ni Hannah Galvez, Bombo International Correspondent sa Japan, nakasinati og system downtime ang pipila ka bangko ug convenience store, lakip na ang mga serbisyo sa Narita Airport. Tungod niini, adunay mga Pilipinong pasahero nga wala makapa-check-in sa airport tungod sa problema sa sistema.
Gipasabot ni Galvez nga bisan pa man sa abante nga teknolohiya sa Japan, nakahimo gihapon og pagsulod ang mga hacker sa pipila ka sistema pinaagi sa cyberattacks ug ransomware. Naapektuhan usab ang website sa usa ka national English examination nga gilauman nga kuhaon sa milyon-milyong estudyante sa nasud.
Dugang pa niya, dili lamang mga pribadong establisimyento ang naapektuhan kondili lakip usab ang mga ahensya sa gobyerno ug nagkalain-laing negosyo sa Japan.
