Nagpagawas og show cause order ang Impeachment Court batok kang Atty. Paolo Panelo, tigpamaba ni Vice President Sara Duterte, tungod sa iyang mga pahayag nga nagpunting og pagsaway sa mga senator-judge nga nagdumala sa impeachment trial batok sa Bise Presidente.
Nagsugod ang isyu human sa ika-44 nga adlaw sa pagtaral niadtong Nobyembre 19, diin gikuwestiyon sa pipila ka senator-judge ang testimonya ni Atty. Rainer Dela Fuente, testigo sa depensa.
Matod ni Panelo, daw ang mga senator-judge mismo ang nagkuwestiyon sa kredibilidad sa mga testigo sa depensa, lakip na ang ilang mga pangutana ug komento atol sa pagtaral.
Tungod niini, nagpahayag og kabalaka si Senator-Judge Erwin Tulfo sa ika-45 nga adlaw sa pagdungog karong Biyernes, Nobyembre 20, ug mihangyo nga magpagawas og show cause order batok kang Panelo.
Matod ni Tulfo, dili man kabahin sa impeachment proceedings si Panelo apan naghatag kini og mga komento batok sa mga senator-judge, bisan pa nga ang iyang giserbisyuhang Bise Presidente maoy giatubang sa impeachment trial.
“You are the spokesperson of the Vice President na on trial here and then magkokomento ka hinggil sa mga senator-judges of the Impeachment Court, eh para namang wala pong respeto sa ika nga Impeachment Court,” ani Tulfo.
Pinaagi sa show cause order, gimandoan si Panelo nga mopasabot kon nganong dili siya angay pahamtangan og tukmang aksiyon tungod sa iyang mga pahayag.











