-- ADVERTISEMENT --

Nanawagan si House Speaker ug AIPA President Faustino “Bojie” Dy III sa mga magbabalaod sa Southeast Asia nga palig-onon ang panaghiusa ug himuong konkretong mga balaod ang mga kasabotan alang sa malinawon, mauswagon ug nakasentro sa katawhan nga ASEAN.

Gipahayag kini ni Speaker Dy human sa pormal nga pag-abri sa ika-47 nga General Assembly sa ASEAN Inter-Parliamentary Assembly (AIPA) kagahapon.

Gipasiugda ni Dy nga anaa sa mga parliamento ang gahum sa paghimo og mga balaod ug paggahin og pondo aron masiguro nga mabati sa mga mag-uuma, mamumuo ug gagmay nga negosyo ang kauswagan ubos sa ASEAN Community Vision 2045.

Giawhag usab niya ang mas hugot nga kooperasyon sa rehiyon aron maatubang ang cybercrime, disinformation ug mga risgo nga may kalabotan sa artificial intelligence (AI).

Isip presidente sa AIPA, gipasalig ni Dy nga palig-onon sa Pilipinas ang relasyon tali sa ehekutibo ug lehislatura. Iyang gipakasama ang panaghiusa sa 11 ka nasod nga sakop sa ASEAN ngadto sa mga uhay sa humay nga gihigot sa logo sa ASEAN, diin matod niya, walay hagit nga makabungkag sa rehiyon kon magtinabangay ug maghiusa ang mga nasod niini.

-- ADVERTISEMENT --