GENSAN- Giandaman na ang pagpatukod sa bag-ong overpass nga nagkantidad og P18.6 million sa Barangay Tinagacan, General Santos City, gamit ang pondo gikan sa National Government.
Gipahibalo kini ni Mayor Lorelie Geronimo Pacquiao human sa iyang pakigtagbo kang Barangay Tinagacan Punong Barangay Jeoffrey A. Salanio ug mga kawani sa Department of Public Works and Highways o DPWH Region 12.
Gihisgutan sa maong panagtagbo ang mga lakang alang sa pagpatuman sa proyekto.
Tumong sa maong overpass nga masiguro ang kaluwasan sa mga molabang ug mas hapsay nga dagan sa trapiko sa maong lugar.
Matod ni Mayor Pacquiao, magpadayon ang koordinasyon sa lokal nga panggamhanan ug mga ahensya sa gobyerno aron matuman ang mga proyektong makatabang sa kalamboan sa matag barangay sa siyudad.











