Gisupak ni Senator-Judge Erwin Tulfo ang mga pahayag ni Atty. Paolo Panelo, tigpamaba ni Vice President Sara Duterte, nga nag-akusar sa pipila ka senator-judge og pagpihig batok sa Bise Presidente ug pagkuwestiyon sa kredibilidad sa mga testigo sa depensa.
Sa wala pa ipresentar ang testimonya sa sunod nga testigo sa depensa nga si Department of Trade and Industry (DTI) Undersecretary Ceferino Rodolfo, gihangyo ni Tulfo nga mahibal-an kon unsay mahimong aksyon sa impeachment court batok sa mga komento ni Panelo.
Matod ni Tulfo, dili man kabahin sa pagtaral si Panelo apan nagpadayon kini sa paghatag og mga komento batok sa mga senator-judge nga nagdumala sa impeachment trial.
Gipasiugda usab ni Tulfo nga daw kawalay pagtahod kini sa impeachment court, ilabina kay gikan mismo sa tigpamaba sa Bise Presidente nga giatubang ang impeachment trial.
Matud pa, niadtong Nobyembre 19, giakusahan ni Panelo ang pipila ka senator-judge nga nagpakita matod pa og pagpihig batok kang Duterte human kuwestiyonon sa mga nasampit ang kredibilidad sa testigo sa depensa nga si Atty. Rainer Dela Fuente.
Partikular nga iyang gitumong sila Senators Raffy Tulfo, Francis “Kiko” Pangilinan ug Risa Hontiveros.
Matod pa ni Panelo, dili trabaho sa mga senator-judges ang pagdaot sa kredibilidad sa mga testigo kay responsibilidad kini sa prosecution panel.











