Gipatin-aw sa lokal nga panggamhanan sa dakbayan sa Heneral Santos nga limitado ra ang ilang mahimo kabahin sa nagpadayon ug na-ong-ong nga konstruksyon sa Mabuhay Underpass Project.
Matud ni City Administrator Shandee Llido Pestano, ang mabuhat lamang sa lokal nga gobyerno mao lamang ang pagpadangat sa kahimtang ngadto sa Department of Public Works and Highways (DPWH) Central Office aron unahon ang Gensan sa pagtagad sa proyekto.
Dugang pa nga dugay na kaayo ang nasangpit nga underpass project ug nakaapekto na kini sa kahapsay sa trapiko ug sa adlaw-adlaw nga lihok sa mga residente.
Dugang pa ni Pestano, ang mga kalit nga pag-ulan ug natural nga kondisyon sa panahon dili nila kontrolado, ug kini mahimong hinungdan sa posibleng pagbaha sulod sa underpass kung magpadayon ang mga kalangan sa konstruksyon.
Nagpabilin ang hangyo sa lokal nga panggamhanan ngadto sa DPWH nga aksyunan dayon ang proyekto aron mahupay ang problema sa trapiko ug kaluwasan sa publiko sa maong lugar.
