Dili masayang ang mga balota ug uban pang election paraphernalia nga na-procure na alang sa 2026 elections, tungod kay mahimo pa kining magamit sa umaabot nga eleksyon.
Kini ang gipatin-aw ni Atty. Jeljan H. Panal, Regional Election Attorney sa COMELEC Region 12, atol sa paghisgot sa epekto sa postponement sa 2026 elections.
Matud ni Panal, bisan pa og adunay marka ang mga balota nga “2026 November Elections,” mahimo gihapon kini gamiton sa sunod nga eleksyon kung tugotan sa COMELEC En Banc pinaagi sa tukmang resolusyon.
Lakip sa mahimong magamit mao ang mga election materials nga na-procure na ug wala pa magamit tungod sa postponement.
Sumala sa COMELEC 12, ang maong pamaagi makatabang aron malikayan ang pag-usik sa mga election materials ug mapamenos ang gasto sa gobyerno.
Gipaabot nga ang COMELEC En Banc maoy magbuot sa tukmang pamaagi sa paggamit sa maong mga materyales sa umaabot nga eleksyon.
