Nagpadayon sa normal nga operasyon ang General Santos City Fish Port Complex bisan pa nga adunay upat ka merkado sulod sa pasilidad ang gi-red tag sa Office of the Building Official (OBO) human sa kusog nga linog niadtong Hunyo 8, 2026.
Matud ni Fish Port Manager Paris Uldarico Ayon, temporaryong gibalhin sa mga tolda ang mga negosyante aron magpadayon ang ilang negosyo samtang naghulat sa rehabilitasyon sa mga apektadong merkado.
Gipasabot usab ni Ayon nga ang mga pantalan o harbor sa fishport wala maapektohi sa linog ug padayon ang normal nga pagdunggo ug pagbiyahe sa mga sakayan.
Samtang nagpadayon ang rehabilitasyon sa mga nadaot nga pasilidad, gisiguro sa dumala sa fishport nga walay dakong epekto ang sitwasyon sa operasyon sa industriya sa pangisda sa siyudad.
