Sublling gitay-og ug magnitude 5.5 nga linog ang duol sa Balut Island, Municipality of Sarangani, Davao Occidental kaganihang buntag, Hulyo 18, sumala sa Philippine Institute of Volcanology and Seismology o PHIVOLCS.
Natala ang linog alas-10:23 sa buntag, diin nabati kini sa pipila ka lugar sa Soccsksargen ug kasikbit nga mga probinsya.
Base sa report sa PHIVOLCS, naobserbahan ang Intensity II nga pag-uyog sa Maasim, Sarangani ug Palimbang, Sultan Kudarat.
Samtang, nabati usab ang Intensity I sa General Santos City; T’boli ug Tupi sa South Cotabato; Kiamba ug Maitum sa Sarangani; Santa Maria sa Davao Occidental; ug Kalamansig sa Sultan Kudarat.
Wala pay initial report ang PHIVOLCS sa kadaot sa mga imprastraktura o mga apektado sa maong paglinog. Padayon usab ang pagmonitor sa mga otoridad kabahin sa posibleng epekto niini.
Kahinumduman nga kaganihang alas 12 sa kadlawon una nang nakasinati ug pagtay-og ang mga nasampit nga lugar, hinoun walay kadaot ug casualty ang natala.
