Usa ka 14-anyos nga dalagita ang namatay human giingong giatake ug napaakan sa banakon samtang naligo sa sapa sa Crossing Kuda, Barangay Batian, Maitum, Sarangani Province.
Sumala sa impormasyon gikan sa pamilya, naligo ang biktima uban sa iyang tulo ka ig-agaw sa maong sapa dihang kalit silang giatake sa banakon.
Matod sa lolo sa biktima, naningkamot pa ang dalagita sa pagpanalipod sa iyang mga ig-agaw apan siya hinuon ang napaakan sa likod nga bahin sa lawas nga miresulta sa iyang kamatayon.
Nagpahayag usab og pakigduyog sa kasubo si Maitum Municipal Mayor James Basquinez Reganit ngadto sa pamilya sa biktima.
Nagpadayon ang pag-monitor ug pagpahinumdom sa publiko nga magmatngon sa pag-adto sa mga suba ug sapa, ilabi na sa mga lugar nga posibleng puy-anan sa mga ihalas nga mananap.
