Posible matod pa nga wala nakuha sa unang kaso sa hantavirus ang impeksiyon samtang anaa sa cruise ship nga MV Hondius, sumala sa usa ka eksperto gikan sa World Health Organization.
Matod ni Anais Legand, technical expert sa viral hemorrhagic fevers sa WHO, ang incubation period sa sakit o ang panahon gikan sa impeksiyon hangtod sa pagsugod sa mga sintomas mokabat og usa hangtod unom ka semana.
Sa kaso sa 70-anyos nga Dutch national nga pasahero, nga usa sa walong kumpirmado ug ginasuspetsahang kaso sa hantavirus, nagsugod siya og bati og sintomas sama sa hilanat, sakit sa ulo, ug mild diarrhea niadtong Abril 6, ug niadtong Abril 11 nakasinati og respiratory distress ug namatay samtang naa pa sa barko sa mao gihapon nga adlaw.
Tungod niini, posible nga ang unang impeksiyon wala nakuha sa barko o sa usa sa mga isla nga padulongan paingon sa Cape Verde.
Giingon usab nga ang maong pasyente klaro nga na-expose na sa rodent o ilaga nga konektado sa impeksiyon sa wala pa pa siya mosakay sa barko.
Sa karon, nagpadayon ang paglawig sa barko paingon sa Canary Islands sa Spain human kini mipabilin sulod sa tulo ka adlaw duol sa Cape Verde gikan niadtong Domingo.
Ang hantavirus kasagarang matakdan gikan sa infected nga ilaga pinaagi sa ihi, hugaw, o laway, ug sa usa ka strain nga gitawag og “Andes virus,” mahimo usab kining mapasa sa tawo pinaagi sa close contact sama sa “exchange of salivas” o halok sa magtiayon.
