Gipangunahan ni Senate Energy Committee Chairperson Erwin Tulfo ang pakigtambayayong sa United Arab Emirates (UAE) alang sa pagtukod og strategic oil storage facility nga gilaom makapalig-on sa suplay sa lana sa Pilipinas ug posibleng makahimo sa nasud nga mahimong regional oil hub.
Sa bilateral discussions niadtong Oktubre 29 sa Abu Dhabi, nakigpulong ang delegasyon sa Pilipinas, nga gipangulohan ni Tulfo, sa mga representante sa Abu Dhabi National Oil Company (ADNOC) aron hisgutan ang maong plano.
Kauban sa delegasyon sila Philippine Ambassador to the UAE Alfonso Ver ug Special Envoy to the UAE for Trade and Investment Kathryna Yu-Pimentel.
Matod ni Tulfo, makatabang ang pagbaton og strategic oil hub aron maminusan ang epekto sa pagsaka ug pagkunhod sa presyo sa lana sa mga Pilipino, ilabina kay limitado ang access sa nasud sa mga pasilidad nga gitagana alang sa pagtipig og reserbang lana.
May kalabotan niini, nagpahayag usab matod pa og kaandam ang UAE, ubos sa pagpanguna ni ADNOC Chairman Sultan Ahmed Al Jaber, nga makigtambayayong sa Pilipinas.
Sa pagkakaron, nagsuplay ang ADNOC og gibana-banang 40,000 ka bariles nga lana kada adlaw ngadto sa Petron. Matod sa delegasyon sa UAE, posibleng madugangan pa ang suplay sa lana sa Pilipinas pinaagi sa planong oil hub.
Gisugyot usab sa ADNOC nga ipaambit sa Pilipinas ang ilang kasamtangang kontrata alang sa oil storage facility aron masusi sa gobyerno.
Gitinguha nga masugdan ang pagpatuman sa proyekto sa ikaduhang quarter sa 2027, apan magdepende pa kini sa kasabutan bahin sa lokasyon, imprastraktura, komersiyal nga kondisyon ug iskedyul sa pagpatuman.
Gawas sa pagtipig og lana, tumong usab sa Pilipinas ug UAE nga palapdan ang kooperasyon sa suplay sa krudo, pagpamuhunan sa mga refinery, fuel retail network, renewable energy ug gas-to-power development.
Matod ni Tulfo, wala pa mapinal ang mga detalye sa mas lapad nga kooperasyon sa sektor sa enerhiya, apan iyang gisaaran nga ipadayon ang mga panaghisgot aron matuman ang kasabutan.
