Duha ka lungsoranon sa China ang gisentensiyahan og 30 ka bulan nga pagkabilanggo sa Estados Unidos human sila miangkon nga sad-an sa pagsulay sa pagrekrut og mga miyembro sa militar sa U.S. aron magpaniid alang sa Beijing.
Giila sa U.S. Department of Justice (DOJ) ang maong mga indibidwal nga sila si Liren “Ryan” Lai ug Yuance Chen, kinsa gisentensiyahan usab og tulo ka tuig nga “supervised release”
Ang duha nagpahigayon og mga transaksyon pinaagi sa pamaaging “dead drop”—diin magbilin sila og liboan ka dolyar isip bayad alang sa mga impormasyon nga may kalabotan sa nasudnong seguridad sa U.S.
Gipakita sa mga dokumento sa korte nga ang duha nagsugod sa paglihok isip mga ahente alang sa Ministry of State Security sa China niadtong Mayo 2021.
Ang mga akusado mikuha usab og mga litrato sa usa ka pasilidad sa nabal, mga bag-ong rekrut sa militar, ug mga aktibong marinero, samtang nangolekta og personal nga impormasyon mahitungod sa usa ka miyembro sa U.S. Navy.
Miangkon sila si Lai ug Chen nga sad-an sa mga kaso sa pagkonsabo aron molihok isip mga ahente, ug sa paglihok isip mga ahente sa usa ka langyaw nga gobyerno nga wala’y pahibalo ngadto sa U.S. Attorney General.
