Nagreport ang Iran nga upat ka mga oil tanker ang nasunog ug mibuto sa Strait of Hormuz, nga gituohang nahitabo human sila miagi sa mga ruta nga wala gitugot sa ilang gobyerno.
Matod sa Islamic Revolutionary Guard Corps (IRGC), ang pipila sa mga barko gituohang naigo sa mga naval mine samtang naglawig sa mga gidili nga ruta sulod niining estratehikong agianan sa tubig.
Lakip sa mga gitaho nga insidente mao ang usa ka supertanker nga nagdala og kapin sa duha ka milyon ka bariles sa krudo, nga gituohang naigo sa usa ka mine, hinungdan nga kini mibuto ug nasunog. Hinuon, ang mga pahayag sa Iran—lakip na ang eksaktong gidaghanon sa mga barko nga nalambigit—wala pa makumpirma.
Samtang, gikumpirma sa Maritime Security Centre sa Oman ang pagluwas sa 25 ka mga tripulante gikan sa usa ka nasunog nga barkong komersyal nga ginganlag RITI, nga naglawig ubos sa bandila sa Panama. Wala pa matino kung kini nga barko apil ba sa upat ka mga tanker nga gitaho sa Iran.
Ang United Kingdom Maritime Trade Operations (UKMTO) nakadawat usab og laing mga taho mahitungod sa mga barko nga naigo sa wala mailhing mga butang o projectile diha sa maong katubigan.
