GENSAN- Gipasalig sa Department of Education (DepEd) sa General Santos City ang mga ginikanan nga makakat-on gihapon ang mga estudyante bisan ipatuman ang asynchronous learning arrangement.
Kini human magpagawas og memorandum ang DepEd Central Office nga nagtugot sa mga eskwelahan nga mosuspinde sa face-to-face classes kon mokabat o molapas sa 42 degrees Celsius ang heat index.
Matod ni Kenneth Carisma, Division Information Officer sa DepEd GenSan, prayoridad sa ahensya ang mga importanteng learning competencies sa literacy, numeracy ug uban pang subject aron masiguro nga maangkon gihapon sa mga estudyante ang gikinahanglang kahibalo.
Gipasabot ni Carisma nga adunay mga giandam nga learning activity sheets ug uban pang buluhaton nga mahimo sa mga estudyante sa ilang panimalay atol sa asynchronous learning.
Pinaagi niini, mapadayon sa mga estudyante ang ilang pagtuon ug mahatagan og prayoridad ang mga importanteng leksyon bisan dili sila makatambong sa face-to-face classes.
