GENERAL SANTOS CITY – Duha ka patay nga lawas sa tawo ang nakaplagan sa Prk. Betus, Brgy Poblacion, Alabel, Sarangani Province.
Kagahapon alas 9:15 sa buntag nakadawat og tawag sa cellphone ang Alabel Municipal Police Station gikan sa usa ka concerned citizen sa impormasyon nga adunay nakit-an nga duha ka mga lawas nga wala nay kinabuhi sa nahisgutang lugar.
Sa inisyal nga imbestigasyon nasayran nga ang mga biktima giila nga sila si Hilarion Alicaway Vibas Jr. 40 anyos ug anak niini nga si John Hilary Bayang Vibas, 4 anyos ug parehong residente sa Prk. Mabuhay, Brgy Poblacion, Alabel Sarangani.
Nakig-alayon dayon ang Alabel MPS sa Sarangani Forensic Unit alang sa pagpahigayon sa SOCO investigation sa crime scene.
Kahibaloan nga sa payag lamang nahitabo ang maong krimen kung asa nagkadugo og may mga samad sa lawas ang duha ka biktima.
Gawas sa mga personal nga gamit, narekober sa crime scene ang kutsilyo nga tapad sa amahan samtang anaa sa tapad ang iyang anak nga nagkulob og may samad sa ulo.
Padayon pang giimbestigahan ang maong insidente.
